á meðan einhver þorir

Nei það tekur sig varla að fara að leggja sig héðan af. Helli bleksvörtum andskota í hvíta frauðplastmálið. Ætti að halda mér gangandi næstu klukkustund. Ég gretti mig við sopann. "Lútsterkur djöfull". Hér sofa allir, nema vaktmennirnir. Þröstur ráfar í kringum hringborðið inni á vaktinni. Held að hann ætti að leggja sig, kappinn og safna kröftum, vinna hjá honum í fyrramálið. Aftur á móti eygi ég tækifæri í hverju horni.

Tuttugu vaktir aukalega ofan á þær föstu fjórtán frá 23. júlí til 15. ágúst. Vissulega finnst mér einhver hetjublær yfir þessu en um það er ekkert nema gott að segja svo framarlega sem öðrum finnist það ekki líka. Nei, ég er ekkert að þessu til þess að segja frá, grobba mig og sýna öðrum. Skrifandi þetta er ég vitaskuld automatískt að skjóta mig í fótinn,,, en annars finnst mér karlmennskan felast í að vera á næturvöktum og vinna mikið, enginn okkar slær slöku við og erum við sex í sérsveit næturmanna á deildinni þetta misserið.

Flutningarnir mallast við lítinn hita. Fátt eftir annað en rúmið og þvottavélin, auk þess á ég eftir að þrífa Skarphéðinsgötuna en er farinn að huga að húsgagnakaupum sem réttlæta má fyrst ég er nú kominn í stærri og fallegri íbúð, þá finnst mér þess varla njótandi til fulls nema hafa viðeigandi húsgögn sem harmonísera við heildina. Einhverjir munu auðvitað ásaka mig fyrir bruðl, en ég hef ákveðið að hlusta ekki á nokkurn annan en sjálfan mig og Gohonson, þessa daga amk.

Verð að koma auka þökkum til basla fyrir aðstoðina, án hans hefði ég þurft að dvelja nokkrar nætur til viðbótar hjá Skarphéðni sem hefði verið mér næstum óbærilegt, svona rétt eins og hjón sem skilin eru að borði og sæng, væru neydd til að sofa áfram saman í sama rúminu.

Ég læt Breiðholtið ekkert fjötra mig, það er annað tækifærið í enn einu horninu. Reyndar ætti það að lappa heilmikið uppá tilveruna almennt þar sem ég er alveg á því að maður njóti þess ekki til fulls að vera í miðbænum búi maður þar á annað borð. Auk þess býr nú fyrrverandi skjólstæðingur minn í næsta húsi á Skarphéðni og annar sem losnar héðan af deildinni eftir mánuð, býr hinu megin í næstu götu. Nei, þetta var það besta sem gat gerst, og tel ég mig eiga Gohonson það að þakka ásamt svo mörgu öðru.

Alveg magnað að geta treyst þessum meistara, þó maður kyrji fyrir einhverju, þá veit hann hvað mér er fyrir bestu og hefur sýnt mér að það sem ég hef kyrjað fyrir er ekki endilega besta lausn allra lausna. Hreinsun skilningarvitanna, en auðvitað þarf ég að kyrja meira, en það mun alltaf verða þannig og þess vegna tilgangslaust að ásaka sjálfan sig, heldur á maður bara að halda áfram að kyrja og síðan bara kyrja meira, og auka það svo.

Jæja ætla að rita liju vallarins e-póst. Þröstur er farinn inná skoðun. Gott að ég sé ekki að teppa tölvuna, það er nefnilega önnur tölva þar.